किराँत सुनुवार सेवा समाज बेलायत (KSWSUK) को वार्षिक साधारण सभा (AGM) ।

२४ तारिख, शनिवार
Aldershot, UK
किराँत सुनुवार सेवा समाज बेलायत (KSWSUK) को वार्षिक साधारण सभा (AGM) २४ तारिख शनिवारका दिन बेलायतको Aldershot स्थित Ozone मा सौहार्दपूर्ण, आत्मीय तथा उल्लासमय वातावरणमा सफलतापूर्वक सम्पन्न भएको छ ।
कार्यक्रमको औपचारिक सञ्चालन समाजका सचिव सकुन सुनुवार ले गर्नुभएको थियो भने सभामा उपस्थित सम्पूर्ण सदस्य तथा अतिथिहरूलाई केदार सुनुवार सङ्केत ले स्वागत मन्तव्य दिएका थिए । उक्त भेलामा किराँत सुनुवार सेवा समाज बेलायतका पूर्व अध्यक्ष यादव तुर्सुचा, जितेन सुनुवार , सल्लहकार छत्र सुनुवार लगायत पूर्व कोषाध्यक्ष इन्द्र सुनुवार, संस्थाका सदस्यहरू चन्द्र कुमार कोर्मोचा, नरेन्द्र सुनुवार, गौरिधन सुनुवार, पार्वती सुनुवार, शुभद्रा सुनुवार, दिलीप सुनुवार लगायत धेरैको बाक्लो उपस्थिति थियो ।
कार्यक्रमको पहिलो चरणमा समाजका विभिन्न वार्षिक प्रतिवेदनहरू प्रस्तुत गरिएका थिए । यस क्रममा: समाजका अध्यक्ष आकाश सुनुवार ले वार्षिक प्रगति प्रतिवेदन प्रस्तुत गरे भने कोषाध्यक्ष खजेन्द्र सुनुवार ले आर्थिक प्रतिवेदन प्रस्तुत गरेका थिए ।
यसै गरी शिक्षा कोष (Education Fund) सम्बन्धी प्रतिवेदन उपाध्यक्ष प्रकाश जिजिच सुनुवार कार्यक्रममा उपस्थित हुन नसकेका कारण सचिव सकुन् सुनुवार द्वारा प्रस्तुत गरिएको थियो ।
त्यसै अवसरमा KSWSUK को सम्पत्ति (Property) सम्बन्धी विस्तृत जानकारी मिलन सुनुवार ले सभासमक्ष प्रस्तुत गरे ।
कार्यक्रमको मध्याह्नमा सहभागीहरूका लागि खाजाको व्यवस्था गरिएको थियो ।
कार्यक्रमको दोस्रो चरणमा कोइँच सुनुवार समुदायको स्मारिका “प्लेँ:कास” को औपचारिक विमोचन गरिएको थियो । उक्त स्मारिकाको सामूहिक विमोचन ज्येष्ठ नागरिक सल्लाहकार छत्र सुनुवार, समाजका अध्यक्ष आकाश सुनुवार तथा शुभद्रा सुनुवार द्वारा सुसम्पन्न भयो ।
यसै चरणमा समाजको घर खरिदसम्बन्धी रोडम्याप र यसको संक्षिप्त विवरण संयोजक केदार सुनुवार सङ्केत ले प्रस्तुत गरेका थिए ।
आउँदो वर्षका लागि तय गरिएका कार्य योजना तथा एजेन्डाहरू पारित गरिएपछि स्मारिका प्लेँ:कास भित्र समावेश गरिएको एउटा कविता वाचन पनि गरिएको थियो, जसले कार्यक्रममा साहित्यिक र भावनात्मक गहिराइ थपेको देखिन्थ्यो ।
कार्यक्रमको अन्त्यतिर प्रश्नोत्तर सत्र सञ्चालन गरी सहभागीहरूले उठाएका जिज्ञासाहरूको स्पष्ट जवाफ दिइयो । आपसी छलफल, सुझाव आदान–प्रदान तथा पारदर्शिताको अभ्यास यस वार्षिक साधारण सभामा सशक्त र सकारात्मक ढङ्गले प्रस्तुत भएको देखियो ।
समग्रमा, किराँत सुनुवार सेवा समाज बेलायतको यो वार्षिक साधारण सभा सङ्गठनात्मक रूपमा सुदृढ, भावनात्मक रूपमा आत्मीय तथा समुदायको भविष्यप्रति आशावादी सन्देश दिने खालको रहेको थियो ।