हा हा हासल हासल

-भावना परिष्कृत सुनुवार

बैशाखे पूर्णिमा उभौली पर्वमा
ष्याँदर पिदार गर्ने चण्डीको थानमा
दुमा र ग्यूमा ढोलको ताल फेर्दै
झ्याम्म–झ्याम्म झ्याम्टा बजाउँदै
इन्द्रधनुष पहिरनमा ब्लुकुम्सला गर्दै
सबै दुःख थकान भुलेर
ष्याँदर सीलमा रम्दा भरिन्छ जोस र उर्जा
हा हा हासल हासल, हा हा हासल हासल
खल्पी खल्पा बासल, ग्योम्ली ग्योम्ले गासल
हा हा हासल हासल, हा हा हासल हासल !!

ष्याँदर देयी देयाको पिदार गर्दै
प्रकृति र पितृदेवको स्मरण गर्दै
पाकेको नयाँ अन्न बाली अर्पण गर्दै
नयाँ बीज र बिरुवाको रोपाई गर्दै
पूर्खाहरूसँग आशिष माग्दै
प्रकृति शक्तिको जय जयकार गाउँदा
भरिन्छ नया जोस र उर्जा
हा हा हासल हासल
खल्पी खल्पा बासल
ग्योम्ली ग्योम्ले गासल
हा हा हासल हाहा हासल हासल !!

बुढापाका, अधवैँशे, भाण्टा–भुण्टी तन्नेरी सबै
ष्याँदरको सीलमा पौठेजोरी खेल्दै
दुमा र ग्यूमा ढोलको दोहोरी मच्चाउँदै
हरियो स्याउला हल्लाउँदै, सेतो टोट्लाको पुष्प–वृष्टि गर्दै
प्रेम र सौहार्दाले परिवार ,नाता ,समाज भेला भई
पुर्सुङ्ग ,एरि रकोदेलेको सामुहिक भोज खाँदा
भरिन्छ नया जोस र उर्जा
हा हा हासल हासल
खल्पी खल्पा बासल
ग्योम्ली ग्योम्ले गासल !!

झुम्के रुमाल फेनेरेल्फ कुममाथि झुलेको
आफ्नै हातले बुनेर सोल्टिनीले दिएको
तीनपाने रिद्दो पोङबाट सार्दै
जिरमाको रसलाई छपनीमा तार्दै
सोल्टिनीले डाक्छिन है कर्के आँखा लगाउँदै
ष्याँदर सीलमा रमाउँदै मुग्दुमी स्लाक गाउदा
भरिन्छ नया जोस र उर्जा
हा हा हासल हासल
खल्पी खल्पा बासल
ग्योम्ली ग्योम्ले गासल !!

नाःसोले पिदार गरी ष्याँदर देयी जगाउछन
पोइब र ग्याँमी फलाक्दै पितृदेवलाई पुकार्छन
सुख, शान्ति, सम्बृद्धिको मङ्गलकामना गर्दै
रोग कष्ट अमङ्गल टाढा भागोस् भन्दै
सामूहिक प्रार्थना ष्याँदर देयी संग गरिदा
देश सम्झी परदेशी घर फिर्दा
नया जोश र उर्जा भरिन्छ
हा हा हासल हा हा हासल हासल
खल्पी खल्पा बासल
ग्योम्ली ग्योम्ले गासल
हा हा हासल हासल !!

ष्याँदरको बरिथुँ साटासाट गरेर
पशु, पक्षी, प्रकृति सबको अनुकरण गरेर
दुम्सी नाच, धोविनी नाच, भालु नाच
पवन नाच, नाःसो नाच… फेरि–फेरि नाचेर
ढोलको भाका फेर्दै, खुये खुये खुये भन्दै
सुरो थुन्दै ढोलेहरू घरघर घुम्दै
श्यादर पिदार उभौली मनाउदा
नया जोश र उर्जा भरिन्छ
हा हा हासल हासल हा हा हासल हासल
खल्पी खल्पा बासल
ग्योम्ली ग्योम्ले गासल
हा हा हासल हासल हा हा हासल हासल !!

Share

Leave a Reply

Your email address will not be published.